BUTUAN CITY- Masinati na ugmang adlawa ang pagsaka sa presyo sa petrolyo human sa rollback niadtong miaging semana, samtang nagpabiling dili lig-on ang kahimtang sa global oil market.
Sumala ni Energy Secretary Sharon Garin, mosaka og P2.49 matag litro ang gasolina, P3.84 ang diesel, ug P5.01 ang kerosene.
Ang pinakabag-ong pagsaka misunod sa rollback diin mikunhod ang presyo og P4.70 sa gasolina, P4.30 sa diesel ug P4.88 sa kerosene, apan nagpabiling taas ang lokal nga presyo tungod sa pag-usab-usab sa presyo sa krudo ug refined fuel sa kalibotan, paglihok sa foreign exchange, ug mga risgo sa suplay ug seguridad sa internasyonal nga mga ruta sa pagbiyahe sa lana.
Gipasabot sa Department of Energy nga ang Pilipinas usa ka net importer sa petroleum products, hinungdan nga dali maapektuhan ang lokal nga presyo sa petrolyo sa pagbag-o sa global oil market ug mga kagubot sa suplay.
