BUTUAN CITY – Gibalik na sa prisohan si kanhi Pakistani Prime Minister Imran Khan, human siya gipa-ilalom sa medical examination sa mga doktor sa usa ka ospital sa Islamabad ug gideklara nga “medically fit” o angayan na sa pagbalik sa prisohan.
Sumala ni Pakistani Information Minister Attaullah Tarar, gisusi si Khan sa usa ka grupo sa mga kwalipikadong doktor, lakip ang ophthalmologist, cardiologist ug physician.
Niadtong Martes, gimando sa Supreme Court nga dad-on si Khan sa ospital sulod sa 48 ka oras aron masusi sa mga doktor, human mireklamo bahin sa iyang kahimtang sa panglawas.
Kini ang usa sa pinakadakong kahupayan nga nadawat ni Khan gikan sa korte sukad sa iyang pagkabilanggo niadtong 2023 tungod sa mga kaso sa korapsyon, nga iyang gika-ingong adunay politikal nga motibo.
Gawas sa pagpa-ospital, gimando usab sa korte nga tugotan si Khan nga makigkita sa iyang pamilya, nga dugay na niyang wala mahimo sulod sa daghang mga bulan. Niadtong Martes sa gabii, mibisita kaniya sa prisohan ang iyang igsoon nga babaye nga si Azma Khan.
Matud ni Tarar, nagpabilin si Azma sa tanang yugto sa medical examination ni Khan hangtod sa Huwebes sa gabii.
Samtang, ang palibot sa Shifa International Hospital gibabagan sa kapolisan pinaagi sa mga barrier, police officers ug mga police van. Nakita usab ang mga sakyanan nga gibalhin aron malimpyohan ang dalan, samtang nagpatrolya ang mga police car ug armored vehicles sa palibot sa ospital.
