BUTUAN CITY – Padayon pang giberipika sa Armed Forces of the Philippines (AFP) ang mga reports bahin sa usa ka Pilipino nga gika-ingong namatay samtang nakig-away kauban sa pwersa sa Russia sa nagpadayong gubat sa Ukraine.
Sumala ni AFP spokesperson Col. Francel Margareth Padilla, wala pa opisyal nga makumpirma sa militar ang identity sa maong Filipino fighter, apil na ang insaktong nahitabo rason nga sayo pa kaayo aron maghatag ang AFP og tino ug klarong pamahayag tungod kay nagpadayon pa ang imbestigasyon ug pag-validate sa impormasyon.
Gipadayag kini sa AFP human sa report gikan sa usa ka independent Ukrainian news agency nga usa ka 37-anyos nga Pilipino nga gikan sa Metro Manila ang namatay sa Donetsk Region samtang nakig-away alang sa panig sa Russian military.
Base sa impormasyon nga nakuha sa Ukrainian Defense Intelligence, nakakuha matud pa ang fighter og Russian visa niadtong Enero 2026 ug mi-adto sa Russia niadtong Abril human mipirma og kontrata uban sa Russian Armed Forces niadtong Mayo 3.
Human sa usa ka semana nga military training, gika-ingong gipadala dayon ang maong Pilipino ngadto sa frontline, diin siya namatay niadtong ulahing bahin sa Mayo atol sa usa ka pag-atake duol sa Katerynivka sa Donetsk Region.
