BUTUAN CITY- Gipresenta sa House prosecution panel sa hearing sa misuse of confidential funds ni Vice President Sara Duterte ang usa ka acknowledgment receipt giikan sa Office of the Vice President (OVP) nga gisumite sa Commission on Audit (COA).
Nakalatid niini nga ang kontrobersyal nga pangalang “Mary Grace Piatos” mingdawat og P70,000 isip “payment of reward (medicines)”.
Sumala sa testigo sa prosekusyon nga si Roderick Wamil, kanhi state auditor sa COA Intelligence and Confidential Funds Audit Office o ICFAO, ang maong acknowledgment receipt dili igo ug kuwang sa mga supporting documents.
Gihatagan og ginbug-aton usab niini nga ang maong resibo posibleng adunay paglapas sa Joint Circular 2015-01 tungod walay gikusip nga dokumentong nagpamatuod nga nagmalampuson o documents evidencing success sa operasyon o transaksyon kinsa hugot nga rekisito ugaling magpagawas og “payment of rewards” gamit ang confidential funds.
Gipangutanan usab ni House prosecution counsel Atty. Lorna Kapunan ang testigo kung ang gibayad ba nga reward usa ka tambal.
Sigon sa testigo, dili kini matumbok pinaagi lang sa gikuptang resibo hinungdan nga nangayo ang COA og dugang nga pagklaro ug dokumento.
Kahinumdumang dugay nang gikwestyon sa mga magbabalaod sa gihimong hearing sa House of Representatives kaniadto ang pangalang Mary Grace Piatos tungod aduna kini susamang pangalan sa sikat nga chichirya ug restaurant.
Gikomperma usab kani-adto sa Philippine Statistics Authority (PSA) nga walay opisyal nga record sama sa birth, marriage, o death certificate ang pangalang “Mary Grace Piattos” sa tibuok nasud, mao nga nagtuo ang prosekusyon nga kini usa ka pekeng identidad aron itago ang paggasto sa confidential funds.
