BUTUAN CITY – Temporaryong nahimong gawasnon si kanhe Senador Ramon “Bong” Revilla Jr. human makapiyansa og usa ka milyon ka pesos alang sa iyang giatubang nga kasong malversation.
Gi-aprubahan sa Sandiganbayan Third Division ang iyang petisyon para sa temporaryong kagawasan samtang nagpadayon ang pagataral.
Mibiya siya sa Quezon City Jail Male Dormitory sa Payatas bandang alas-6:15 sa gabi-i.
Sumala sa desisyon sa korte, gitugutan siyang makapiyansa tungod kay napakyas ang prosekusyon nga magpakita og lig-on nga ebidensya ning panahana sa pagdungog.
Mahinumdumang nag-atubang si Revilla sa mga kasong graft ug malversation mahitungod sa matud pa anomalya sa 92.8-milyones pesos nga “ghost flood control project” sa Pandi, Bulacan, nga pila ka higayon usab niyang gihimakak ang bisan unsang pagkalambigit sa nasangpit nga scheme.
Bugtong ang petisyon lang ni Revilla ang gitugutan samtang gibalibaran sa Sandiganbayan ang aplikasyon para sa piyansa sa iyang mga kaubanang akusado.
Una nang nagbayad si Revilla pg 90-mil pesos nga piyansa para sa bulag niyang kasong graft sa ilalom sa Fourth Division.
Tungod kay aprubado na usab ang iyang Uno Milyones pesos nga piyansa para sa malversation, hingpit na siyang nakauli.
Sa iyang unang Facebook post human ang desisyon sa anti-graft court division, nagpasalamat si Revilla sa Kahitas-an.
