BUTUAN CITY- Gitaho sa Office of Civil Defense (OCD) nga dili ra kaayo grabe ang epekto ni bagyong Kiyapo sa mga lugar sa Northern Luzon nga gi-agian niini Kini taliwa sa mga serye sa pag-ulan ug adunay gikusgon sa hangin nga resulta sa maong bagyo.
Sa exclusive interview sa Bombo Radyo kang OCD Spokesperson, Junie Castillo, sigon niining minimal lang ang epekto sa bagyo, bisan pa sa mga lugar nga gipa-ilawom sa Tropical Cyclone Signal No. 2, samtang gi-ila usab sa pipila nga ‘beneficial’ ang ulan nga minghapak sa mga umahan.
Bisan paman, dili matud pa malimod nga masdako ang epekto sa hanging habagat nga gipakusog sa bagyong Kiyapo, hilabi na sa Visayas ug Mindanao. Sa mga maong rehiyon, adunay kapin 30 ka lugar nga nakasinati og mga serye sa pagbaha ug pila ka adlaw usab nga nahumol sa tubig-baha. Sa mga maong lugar, kapin 27,000 ka pamilya ang natumbok nga apektado.
Dugang pa ni Castillo, dakong tabang ang sayo nga deployment ug hugot nga monitoring sa mga lugar nga unang nasuta nga ma-apektuhan sa bagyo, aron mamintinar ang minimal nga epekto sa mga bagyo sa asa mang lugar.
Hugot usab nga gisiguro sa administrasyong Marcos ang sayohon ang deployment sa ground level ug hugtan ang pagbantay sa gi-ilang risk areas aron malikayan ang casualties ug grabe nga epekto sa mgakabtangan ug pasilidad.
