BUTUAN CITY – Midangop na dinhi sa Bombo Radyo Broadcast Center ang kabanay sa 2-anyos nga batang lalaki human kini kalit nga na-missing kagahapon samtang gibiyaan lang og makadiyot sa iyang inahan sulod sa balay.
Sa eksklusibong pakighinabi sa Bombo Radyo Butuan, gipadayag ni Regie Lagnada, uyuan sa biktima, ug residente sa Purok 5, brgy Camayahan, ning siyudad sa Butuan, gipatan-aw lang matud pa sa iyang inahan og cell phone ang bata kagahapon sa alas-10:30 sa buntag tungod kay nanilhig kini sa gawas ug dihang iya kining gibalikan, wala na ang biktima.
Hangtud karon, wala pa’y ideya ang pamilya kung unsa ang nahitabo sa bata rason nga pulos lang sila panaghap.
Usa sa ilang gilantaw, posibleng gitukob kini sa halas, ingon man ang posibilidad nga gikuha matud pa kini sa ingon nato tungod sa gamay nga kahoy’ng balite duol sa pinuy-anan. Apan mas dako ang ilang pagtuo nga nalabyan kini og tawo ug gipunit tungod kay imposible usab matud pa kung gitukob kini sa halas gumikan kay dako na kini.
Nanghinaut na lamang si Lagnada nga kung duna’y makakita sa maong bata, ipahibalo kini dinhi sa Bombo Radyo o kaha sa pinakaduol nga police station o ba kaha sa barangay officials sa Camayahan.
Kini tungod kay wala gihapon nila kini makita taliwa nga ila nang gisuhid ang halos kinatibuk-ang bukid. Hugot usab niining gipanawagan ang kapulisan nga imbestigahan ang maong hitabo aron maklaruhan unsa ang nahitabo sa biktima ug kung gikuha man, mapanubag ang mihimo niini.
