BUTUAN CITY – Nagkahi-usa ang mga nasud nga sakop sa Association of Southeast Asian Nations kon ASEAN sa panawagang ceasefire ug malinawong negosasyon human ang nagka-init nga giyera sa Iran ug Estados Unidos nga naghatag og dakong epekto sa ekonomiya, enerhiya ug seguridad.
Atol sa ASEAN Foreign Ministers Meeting kagahapon didto sa kauluhang Manila, gibutyag ni Foreign Affairs Secretary Maria Theresa Lazaro nga nagpagawas og joint statement ang mga foreign ministers human nabalaka sa padayong tensyon sa Middle East.
Sigon sa opisyal, angayang ipatigbabaw sa tanang panig ang pinakataas nga level sa pagpugong aron malikayan ang mas lapad nga kagubot ug maprotektahan ang mga sibilyan.
Gihataga’g pagtagad sa ASEAN ang gawasnon ug luwas nga paglawig sa Strait of Hormuz, usa sa pinaka-importanteng rutang gi-agian sa mga commercial vessels alang sa supply sa lana sa tibuok kalibutan aron dili malangay ang pangkalibutanong pamatigayon ug supply sa enerhiya.
