BUTUAN CITY– Nagpagawas ang World Health Organization kon WHO og bag-ong giya aron mapakunhod ang risgo sa memorya ug dementia, nga nagtanyag og mga rekomendasyon nga gibase sa siyensya aron mapugngan o malangan ang pagsugod sa maong kondisyon.
Sumala sa ni Dr. Tedros Adhanom Ghebreyesus Director-General sa WHO, nga kapin sa 57 milyon ka tawo sa tibuok kalibutan ang nagpuyo uban sa dementia, diin halos 10 milyon ang madayagnos matag tuig.
Bisan wala pay tambal nga makapaayo niini, gibanabana nga hangtod 45 porsyento sa risgo mahimong malikayan pinaagi sa paglikay sa panigarilyo, sobra nga pag-inom og alkohol, kakulang sa ehersisyo, social isolation, polusyon sa hangin, ug pagkontrol sa mga sakit sama sa taas nga presyon sa dugo ug diabetes.
Giawhag usab sa WHO ang pagpraktis og himsog nga estilo sa kinabuhi, pag-apil sa mga kalihokan nga makapalihok sa utok, pagmentinar sa sosyal nga koneksyon, ug sayong pag-atiman sa mga sakit aron mapanalipdan ang kahimsog sa utok ug mapauswag ang kalidad sa kinabuhi sa mga tawo.
