BUTUAN CITY – Sangko sa langit ang pagpasalamat sa 39-anyos nga si Sheryl Tiologo, residente sa Purok 6, Sitio Matin-ao, Brgy Bonbon, ning siyudad sa Butuan human nga hingpit na niyang nadawat kaganina ang nadag-ang usa ka milyon ka pisos nga grand prize sa Buena Mano Salvo Year 20 Promo sa Bombo Radyo at Star FM.
Kini tungod kay matuman na gayod nila ang pangandoy sa ilang pamilya apil na ang paghatag og 10-porsientong offering ngadto sa ilang simbahan.
Gawas pa kini sa paliton nilang sakyanan aron duna’y magamit sa senemanang discipleship sa ilang simbahan sa ingon dili na kaayo sila mugasto og kapin sa usa ka libo ka pisos alang lang kahimayaan sa Ginoong Diyos.
Sigon sa ika-81 nga miyembro sa Bombo Millionaire’s Club, unom ka tuig na siyang misalmot sa mga promos sa Bombo Radyo Philippines kondiin sa pinaka-ulahing Buena Mano Salvo promo, iya lang matud pang gi-ampo nga padag-on siya og usa ka libo ka pisos apan mas dako pa kaayo ang gihatag kaniya sa Ginoo.
Tungod niini, duna na sila’y magamit aron humanon ang ilang bahay ingon man dugang puhunan sa ilang umahan kansang mga produkto, maoy ilang ginegosyo.
Alayon niini, iyang gi-awhag ang tanan nga musalmot sa mga promo sa Bombo Radyo Philippines aron makabaton og dakong tsansa nga mudaog sama kaniya.
