BUTUAN CITY – Gi-dismiss sa Supreme Court ang petisyon nga nagtinguhang balihon ang ruling sa Commission on Elections kon COMELEC nga naghatag og clearance kang Senador Francis Escudero kalabot sa P30-million nga campaign contribution gikan sa usa ka government contractor, tungod kay sayop ang gigamit nga legal nga remedyo.
Sa notice nga gipirmahan ni Clerk of Court Marife Lombibao-Cuevas, gibutyag sa High Court En Banc nga sa resolusyon nga pinetsahan og Hunyo 3, gibasura niini ang petition for review nga gisubmite ni John Barry Tayam batok kang Escudero ug sa COMELEC Political Finance and Affairs Department (PFAD).
Nasayrang naggikan ang petisyon sa desisyon sa PFAD nga tapuson ang imbestigasyon batok kang Escudero ug negosyanteng si Lawrence Lubiano, presidente sa Centerways Construction and Development Inc., bahin sa P30-milyon nga donasyon atol sa senatorial campaign ni Escudero niadtong 2022.
Gipakita sa PFAD nga walay kalapasan sa Omnibus Election Code, tungod kay si Lubiano ug ang iyang kompanya lain nga legal nga identity ug ang donasyon gihimo ni Lubiano isip personal nga kapasidad ug dili gikan sa kompanya.
Si Tayam, usa ka magtutudlo gikan sa Las Piñas City, nagduda sa konklusyon ug nag-ingon nga si Lubiano, isip majority owner ug presidente sa kompanya, dili angay nga bulagon sa kompanya kung hisgutan ang balaod nga nagdili sa campaign donations gikan sa government contractors.
Sa sinugdanan ning tuiga, gitugotan sa Korte Suprema si Tayam nga isumite ang petition for review aron mapadayon ang kaso apan sa resolusyon niadtong Hunyo 3, gi-dismiss kini sa Korte tungod sa procedural grounds, dayong butyag nga dili angay nga petition for review ang gamiton nga remedyo.
Wala magdesisyon ang Korte Suprema sa merito sa mga alegasyon ni Tayam bahin sa legalidad sa campaign contribution, ug gi-dismiss lang ang kaso base sa procedural issue.
