BUTUAN CITY – Mas gipakusgan karon sa Butuan City Police Station kon BCPS-1 ang Project Gangnam, usa ka community-based intervention program nga gimugna sa Butuan City Police Office kon BCPO aron ma-rehabilitate ang mga ma-rescue nila nga gang members aron masanta ang pagmugna sa mga batan-on ning siyudad og mga gang nga maoy hinungdan sa kagubot ilabina panahon sa kagabhi-on.
Sigon ni PCaptain Namra Arimao Jr – acting station commander, pinaagi sa maong proyekto, mapakusgan nila ang ilang partnership tali sa komunidad, mga tunghaan, lokal nga kagamhanan ug religious sectors.
Gi-adaptar sa maong proyekto ang holistic approach pinaagi sa paghatag sa mga kanhi gang members og vocational, skills development ug pakiglambigit sa komunidad sa ingon masulbad na ang ugat-hinungdan sa mga gubot nga kalihukan sa mga gangs ning siyudad.
Samtang gipadayag usab ni Police Master Sergeant Paul Cebrian Jr., hepe sa Community Affairs and Development Office sa maong istasyon nga natumbok na nila ang mga gangs ning siyudad ug ila na usab nga na-istorya ang mga lider niini rason nga wala na’y natalang mga riot.
Mapasigarbuhon pa niining gipadayag nga duna na sila’y napahuman sa Alternative Learning System kon ALS nga gang leader ug maoy ila karong tutukan tungod kay duna kini kasibot nga makatapos apan wala’y kooperasyon sa mga ginikanan.
