BUTUAN CITY – Misaka sa 9 katawo ang patay samtang 22 ang angol human sa dakong pagbusikad sa bomba sa lugar nga daghang cafe sa sentro sa Damascus, Syria.
Sigon sa interior ministry nga usa ka eksplosibong kahimanan ang gitanom sa sulod sa cafe, nga nahimutang mga 100 ka metros lang ang kalayo gikan sa Palace of Justice, usa ka dakong dakbalay sa gobyerno sa distrito sa Hejaz sa kaulohan.
Wala pa’y miangkon gikan sa bisan unsang grupo nga sila ang nagpaluyo sa maong pag-atake.
Kini ang giila nga labing makamatay nga pagpamomba sa Damascus sukad sa usa ka suicide attack sa usa ka simbahan niadtong Hunyo 2025 nga nakapatay og 25 ka tawo.
Usa ka tago nga grupo sa mga jihadist, ang Saraya Ansar al-Sunnah, nagbutyag nga sila ang nagpaluyo sa maong pagpamomba kaniadto, apan ang mga awtoridad mitudlo sa grupo sa Islamic State (IS).
Si Mohammed al-Dahabi, ang tag-iya sa usa ka tindahan og antipara nga nahimutang tapad sa cafe, nagbutyag nga ang pagpamomba niadtong Huwebes nagpahinumdom sa mga hitabo sa Damascus sa panahon sa civil war sa Syria.
Atol sa iyang pagbisita sa dapit nga nahitaboan, si Damascus Governor Maher Marwan Idlibi nagkanayon nga ang mga responsable niining duguong hitabo pagasilutan gyud.
