BUTUAN CITY – Tulo ka adlaw nga magpatuman og alternative delivery mode ang Escalante National High School sa Negros Occidental human nadiskubrehan ang convo sa duha ka menor-de-edad sa plano nilang muhimo og pagpamusil sulod sa tunghaan.
Mikaylap sa social media ang Facebook post ni Gia Cecilia nga nagpakita sa screen shot sa convo sa iyang pag-umangkon ug usa ka laing menor-de-edad nga gi-ila lang sa alyas nga Jacob.
Sa ilang chat, gibutyag matud pa ni Jacob nga magdala siya og armas aron pamusilon ang mga estudyante.
Gipugngan matud pa siya sa pag-umangkon ni Gia apan gipadayag ni Jacob nga wala na’y makapugong kaniya.
Sa eksklusibong pakighinabi sa Bombo Radyo kang Escalante National High School principal Jesus Tabalino, gibutyag niining girekomenda matud pa sa Department of Social Welfare and Development kon DSWD, City Legal Office ug sa kapulisan, nga suspedihon ang face-to-face classes alang sa kaluwasan sa tanan ilabina sa mga musulod sa school campus.
Gipasabot niining maglisod ang mga pulis nga maglusad og makuting imbestigasyon samtang magbantay usab sa siguridad sa mga estudyante rason nga gipasuspende ang klase aron matutukan gayod ang imbestigasyon.
Kini ilabina nga kini na ang ikaduhang higayon nga nakadawat sila og hulga nga himuon sa ilang tunghaan human sa una kondii nakadawat sila og bomb threat, duha ka tuig na ang nakalabay.
