BUTUAN CITY- Misamot ang tensiyon sa Tunga-tungang Sidlakan human gibasol sa Iran ang Estados Unidos sa kakulang sa tinuod nga paningkamot alang sa kalinaw human sa bag-ong pag-atake sa Israel sa habagatang bahin sa Beirut, Lebanon.
Sumala ni Iranian chief negotiator Mohammad Baqer Qalibaf, ang maong opensiba nagpakita nga walay igo nga kabubut-on o kapasidad ang US sa pagtuman sa mga saad niini, nga mahimong makapaluya sa gilaom nga kasabotan tali sa Tehran ug Washington aron tapuson ang ilang panagbangi.
Samtang nagpadayon ang mga negosasyon uban sa tabang sa Qatar ug Pakistan, nagpadayon usab ang mga engkwentro tali sa Israel ug Hezbollah, diin tulo ka tawo ang namatay sa pinakabag-ong airstrike sa Beirut. Bisan pa sa paglaom ni US President Donald Trump nga mapirmahan ang framework agreement sa dili madugay, nagpabilin nga walay pinal nga desisyon ang Iran tungod sa nagpadayong pagrepaso sa politikal, legal ug teknikal nga mga aspeto sa maong kasabotan.
