BUTUAN CITY – Mi-ani karon og managlahing reaksyon ug mga pangutana ang pagtumaw sa video sa nagpa-ilang asawa ni Ateneo Blue Eagles head coach Tab Baldwin nga si Efi Kalogirou nga mibaraw sa una nang video message nga gipagawas sa coach kalabot sa pagkalumos-patay nila AgSurnon Rene Baterbonia ug Nigerian Divine Adili atol sa ilang boot camp sa us ka beach resort sa Dipaculao, Aurora.
Sa maong video, gipadayag ni Efi nga gikasal sila ni coach Tab niadtong tuig 2011 ug opisyal pa gihapong kasado kaniya apan milayas siya sa sayong bahin sa tuig 2020 alang sa iyang kaluwasan ug sa ilang mga anak.
Gituyo matud pa niya ang pagpagawas og video message isip reaksyon sa video message sa coach kondiin naghisgot kini sa iyang pamilya kondiin iyang gipadayag nga wala magrepresenta si coach Tab kaniya ug sa ilang mga anak.
Dinhi na dayon gisaysay ni Efi nga kaniadto pa niya gipahimangnuan ang Ateneo de Manila University nga dili luwas ang mga bata sa palibot sa maong coach rason nga katungdanan sa maong unibersidad ang pagtangtang kaniya.
Apan wala matud pa siya paminawa ug hinuon, gipadayon sa maong unibersidad ang kampanya sa intimidation and silencing kon pagpanghadlok ug pagpahilom.
Emosyunal usab niining gisulti ngadto sa kabanay sa mga estudyanteng atleta nga ang kamatayon sa ilang mga anak, dili lang matagna kondili malikayan unta ang maong hitabo.
Nanawagan usab siya sa mga Filipinos ug kapulisan nga sayron nganong gitugutan gihapon si Tab nga mupaduol sa mga bata taliwa sa iyang mgapahimangno.
