BUTUAN CITY – Magpahigayon og candle-lighting activity karong Lunes, Hunyo 15 ang Budsmen Ballers Club ning siyudad sa Butuan isip tribute ngadto sa mga basketbolista sa Ateneo Blue Eagles men’s team nga namatay samtang anaa sa boot camp sa Dipaculao, Aurora nga sila Rene Baterbonia nga taga-Talacogon, Agusan del Sur ug Nigerian nga si Divine Adili.
Sa eksklusibong pakighinabi sa Bombo Radyo Butuan, gibutyag ni event organizer Edu Velarde, nga himuon kini sa covered court sa Brgy Imadejas ning siyudad sa Butuan gikan sa alas-sais sa sayong gabii pataas.
Atol sa candle-lighting himuon ang moment of silence nga sundan sa pag-ampo ingon man friendly basketball game isip tribute sa duha ka namatay nga mga student cagers. Abli usab kini ngadto sa tanang mga basketball players ug fans ug mga ball clubs sa Butuan City nga gustong mu-apil paghatag og tribute ngadto sa duha ka basketbolista.
Giklaro ni Velarde nga dili lang kini pagpakita sa ilang pagbangutan sa nadangatan sa duha ka basketbolista ilabina kang Baterbonia nga ila pang naka-uban atol sa finals sa Palarong Pambansa 2026 tungod sa coach niini nga ila usab nga ka-ila ugka-uban kondili aron ipanawagan ang patas ug transparent nga imbestigasyon aron mapanubag ang mga posibleng duna’y tulubagon sa maong hitabo.
Gidugang pa ni Velarde nga ang bugtong nilang tumong nga dili lang ang pagpa-abot sa ilang pahasubo kondili aron hugot nga ipanawagan ang pagpahigayon og lawom nga imbestigasyon sa nasangpit nga hitabo nga nagpatay sa damgo sa AgSurnon cager kinsa duna’y taas nga pangandoy alang sa iyang pamilya aron matud pa mahaw-as gikan sa kalisod.
Alayon niini, nanawagan ang ilang grupo ngadto sa tanang sektor sa katilingban nga gustong mu-uban sa maong kalihukan nga dili magduha-duha aron mas madungog ang ilang tingog sa nasudnong kagamhanan ug mahatagan og klarong tubag ang daghang pangutana sa katawhan sa ingon dili mahadlok ang mga batan-ong basketball enthusiasts nga mupadayon sa ilang pangandoy.
