BUTUAN CITY – Gihimo sa New York Knicks ang pinakadakong comeback sa kasaysayan sa NBA Finals human nila gipapas ang 29-point nga biya aron pildihon ang San Antonio Spurs, 107-106, ug mapaduol sa usa na lang ka daog para makuha ang kampyonato.
Ang tip-in basket ni OG Anunoby sa nahabiling 1.2 segundos ang nagselyo sa kulbahinam nga daog aron ihatag sa Knicks ang 3-1 nga labaw sa best-of-seven championship series.
Ang maong winning basket ni Anunoby nahitabo human sipyata ni Jalen Brunson ang iyang tres.
Sa nahabiling 1.2 segundos, ang Spurs—nga milabaw og 76-49 sa halftime nga maoy pinakadakong labaw sa serye—napakyas sa pag-shoot sa ilang kataposang posisyon sa bola.
Si Brunson mikolekta og 36 puntos samtang si Anunoby midugang og 33 puntos alang sa New York.
Ang star sa Spurs nga si Victor Wembanyama miiskor og 24 puntos ug milabnot og 13 ka rebounds. Si Dylan Harper midugang og 21 puntos samtang silang De’Aaron Fox ug Devin Vassell miamot og tag-18 puntos matag usa alang sa San Antonio, nga mitala og Finals record nga 14 ka tres sa unang tunga sa dula apan napakyas sa paghawid sa ilang dako nga labaw.
Gihatag ni Brunson ang unang labaw sa New York pinaagi sa usa ka floater nga nagbutang sa iskor nga 105-104 sa nahabiling 1:22 sa oras. Nakashoot og duha ka free throws si Stephon Castle sa San Antonio apan mibawi ang Knicks, diin milayat si Anunoby taliwala sa mga depensa sa Spurs aron selyohan ang kadaogan.
Ang kanhi pinakadakong comeback sa Finals anaa lang sa 24 puntos, nga gihimo sa Boston Celtics batok sa Los Angeles Lakers niadtong 2008.
