BUTUAN CITY – Gibatikos ni Jeffrey “Ka Eric” Celiz, Secretary General sa Bangon Sambayanan, ang pamahayag sa Armed Forces of the Philippines kon AFP nga dili na angay tawagon nga kanhi Marines ang 18 ka mga whistleblower nga nalambigit sa kontrobersiya nga gipasikad sa ilang mga testimonya.
Sumala ni Celiz, dili mahimong wala-on sa AFP ang kamatuoran nga ang kadaghanan sa maong mga indibidwal kaniadto nagsilbi isip mga miyembro sa Philippine Marine Corps ug kabahin sa militar sa nasud. Sigon niini, nga bisan wala na sila sa aktibong serbisyo, nagpabilin nga kabahin gihapon sila sa kasaysayan ug organisasyon sa AFP.
Gipahayag usab ni Celiz ang iyang pagdayeg sa mga whistleblower tungod sa ilang pagbutyag sa giingong mga anomalya ug korapsyon bisan pa sa posible nga peligro sa ilang kinabuhi. Dugang pa niini, ang mga isyu sa korapsyon, pagpangawat sa pondo sa gobyerno ug pang-abuso sa gahum dili angay tan-awon isip politikal nga panaglalis kondili mga isyung direktang nakaapekto sa katawhan ug sa nasud. Samtang gihisgutan usab niini ang kontrobersiya sa Senado, kung as matud pa ni Celiz, walay ligal nga basihan ang mga aksyon nga gihimo sa sesyon niadtong Hunyo 3 tungod sa kakulang sa quorum sumala sa iyang interpretasyon sa Konstitusyon.
Gani, iyang gisaway ang pagpangulo ni Senador Erwin Tulfo sa Blue Ribbon Committee ug giingon nga ang mga lakang nga gihimo sa maong sesyon mahimong walay balido gikan pa sa sinugdanan. Nagtuo usab kini nga ang bag-ong reconstituted nga Senate Blue Ribbon Committee nga gipangulohan ni Senador Alan Peter Cayetano maoy angay ilhon, samtang iya usab gipasiugda nga magpabilin gihapong miyembro sa Senado sila Senador Ronald “Bato” dela Rosa ug Senador Jinggoy Estrada ug dili matud pa angay tawagon nga vacant ang ilang mga posisyon ubos sa balaod.
