BUTUAN CITY – Aron masiguro ang kaluwasan sa mga estudyante ug magtutudlo, gisugdan dayon sa Infrastructure Audit Team sa Butuan City Government ang pag-inspeksyon sa mga pampublikong eskwelahan human sa linog.
Walo ka grupo sa audit team ang gipadala sa nagkalain-laing pampublikong eskwelahan aron paspas nga masusi ang kahimtang sa mga building ug uban pang pasilidad.
Base sa unang inspeksyon, adunay minor damages nga nakita sa tulo ka pampublikong eskwelahan.
Padayon pa ang assessment sa ubang mga eskwelahan aron masiguro nga luwas ug andam gamiton ang mga pasilidad alang sa mga estudyante ug magtutudlo hilabina karon nga maoy pagsugod sa klase karong tuiga.
Nasayrang ang ubang mga ginikanan ilabina kadtong elementarya pa ang ilang kabataan, wala una mupa-uli rason nga anaa gayod sila sulod sa school premises dihang mitay-og ang linog.
Sama sa usa inahan sa may FR Sibayan Elementary School sa may Brgy. Baan Km 3 kinsa daling mi-adto sa rooms sa iyang grade IV ug grade VI nga mga anak aron sila makuha.
Aminado ang ginang nga dili basta-bastang kahadlok ug kakulba ang iyang gibati tungod sa kakusog sa pagtay-og.
