BUTUAN CITY- Gisaway ni US Defense Secretary Pete Hegseth, ang mga nasod sa Europa atol sa iyang 82nd D-Day anniversary speech sa France tungod sa ilang pagdumala sa migrasyon, nga iyang gihulagway isip usa ka “invasion” o pagsulong sa ilang mga baybayon.
Sumala pa niini, nga sama sa pag-abot sa mga sundalo sa D-Day aron mahimong gawasnon ang Europe gikan sa okupasyon sa Nazi Germany, karon usab adunay laing hulga nga nag-atubang sa kontinente pinaagi sa pag-abot sa mga migrante sa Spain, Italy, Greece ug Bulgaria. Gipasidan-an usab ni Hegseth nga ang kagawasan nga gipanalipdan sa mga sundalo kaniadto kinahanglan nga mapadayon sa kasamtangang henerasyon sa mga lider.
Ang maong pamahayg dungan sa serye sa mga kritisismo sa administrasyon ni US President Donald Trump batok sa polisiya sa migrasyon sa Europe. Samtang nagpadayon ang debate sa migrasyon sa tibuok kontinente, gipasiugda sa pipila ka mga lider sa Europe nga kinahanglan timbangon ang seguridad sa utlanan ug ang pagrespeto sa tawhanong katungod sa mga migrante nga nangita og mas maayong kinabuhi.
