BUTUAN CITY- Nagpatuman og mas hugot nga security measures ang Senado dungan sa gikatakdang deadline sa pagpasaka ni Vice President Sara Duterte sa iyang tubag sa Articles of Impeachment.
Base sa abiso, hangtud alas-7 lang karung gabie Hunyo 1, posibleng magsumite sa iyang tubag ang Bise Presidente, personal man, pinaagi sa abogado, o sa electronic mail.
Kahinumdumang pormal nga gihatud kang Duterte ang summons niadtong Mayo 20, duha ka adlaw human mag-convene ang Senado isip impeachment court.
Laumang magsugod ang impeachment trial sa Hulyo 6 kung asa mag-atubang si Duterte sa mga reklamong culpable violation of the Constitution, graft and corruption, ug betrayal of public trust.
Tungod sa gilaomang pagdagsa sa media ug mga supporters ug kritiko sa Bise Presidente, nagtudlo ang Office of the Senate Secretary og mga rules alang sa coverage sa media ug nagtudlo og mga lugar kung asa posibleng mohimo og press briefing ang kampo ni Duterte.
Sumala sa Senado, tumiong sa maong lakang nga masiguro ang hapsay, luwas ug episyenteng proseso sa pagpasaka og tubag samtang minghatag usab og igo nga acces ang media sa importanteng panghitabo.
Nakigkoordinar usab ang National Capital Region Police Office (NCRPO) sa Office of the Sergeant-at-Arms aron masiguro ang kaayuhan sa palibot sa Senado.
Samtang sulod na sa pipila ka semana, ang mga pulis nadestino sa gawas sa bilding tungod sa mga protesta sa nagkalain-laing grupo nga adunay lain-laing baruganan sa kaso sa impeachment ni Duterte ug uban pang mga isyu nga giatubang sa Senado.
Samtang, ubos sa Rules of Procedure on Impeachment Trial, aduna usab pila ka adlaw ang prosecution panel aron magsumite sa ilang reply human madawat ang tubag sa Bise Presidente.
