BUTUAN CITY- Nadawat na sa Philippine Olympic Committee kon POC ang suspension order nga gipagawas sa International Volleyball Federation kon FIVB batok sa Philippine National Volleyball Federation kon PNVF.
Sumala ni POC President Abraham “Bambol” Tolentino, posibleng mosunod usab ang komite sa opisyal nga pagsuspinde sa PNVF sa ilang general assembly sa Hunyo, tungod ang mga national federation kinahanglan motuman sa regulasyon sa international bodies.
Ang desisyon sa FIVB gibase sa disciplinary regulations samtang nagpadayon ang independent investigation sa mga paglapas sa PNVF, lakip na ang contractual violations sa Beach Pro Tour event ug daghang paglapas sa Code of Ethics. Aron masiguro ang operasyon, nagtukod ang FIVB og ad hoc committee nga nagdumala sa mga kalihokan sa PNVF.
Ang suspensyon ipatuman dayon, samtang mingsaad ang POC nga magpadayon sa pagsuporta sa kaayohan sa mga atletang Pinoy.
