BUTUAN CITY- Mingpetisyon ang Office of the Ombudsman sa Sandiganbayan nga magpagawas og precautionary hold departure order batok kang Senador Rodante Marcoleta, kanhi Anakalusugan party-list Rep. Mike Defensor, ug duha ka negosyante. Ang hangyo misunod sa rekomendasyon sa mga imbestigador sa Ombudsman nga pasakaan og kasong plunder ug indirect bribery si Marcoleta, Defensor, ug mga negosyanteng sila Joseph Varias Espiritu ug Aristotle Baluyut Viray tungod sa gi-ingong P75 milyon nga donasyon alang sa kandidatura ni Marcoleta niadtong 2025 National and Local Elections.
Base sa dokumento nga gisumiter niadtong Lunes, Mayo 25, ang kaso gi-raffle ngadto sa Seventh Division sa anti-graft court. Sigon sa mga piskal nga ang pagdawat ni Marcoleta sa maong kantidad sa tulo ka higayon mahimong ikonsiderar nga “gift” ug naglangkob sa krimen nga plunder. Apan hangtod karon, wala pa magpagawas og opisyal nga resolusyon ang Ombudsman. Sa iyang privilege speech niadtong Lunes, sumala ni Marcoleta nga ang reklamo batok kaniya usa ka pulitikal nga motibo ug usa ka pamaagi sa pagliko sa balaod.
