BUTUAN CITY – Desi-sais ka mga tawo ang patay sa duha ka insidente sa pagpamusil sa Central American country Honduras.
Natigayon ang unang pagpamusil sa usa ka hilit nga palm farm sa Rigores, parte sa munisipyo sa Trujillo sa amihanang bahin sa nasod.
Sigon ni Edgardo Barahona, tigpamaba sa National Police sa Honduras, mukabat sa 10 ka trabahante ang gipusil patay sa maong lugar, apan gilauman pa nga mosaka ang ihap sa mga namatay.
Wala matud pa’y pili nga gipangpusil sa mga armadong suspek ang mga trabahante, lakip ang pipila nga nagtigom sa usa ka lokal nga simbahan rason sa pagkatag sa mga patay’ng lawas kondiin ang uban niini nagsul-ob pa og baga nga rubber boots nga pangtrabaho kondiin apil sa namatay ang tulo ka managsoon nga babaye.
Bisan wala pa masuta ang motibo sa pag-atake, dugay nang adunay agrarian conflict o panaglalis sa yuta sa amihanang Honduras.
Samtang ang ikaduhang pagpamusil, natigayon sa amihanang Honduras, sa Cortes duol sa utlanan sa Guatemala.
Mi-adto matud pa ang mga pulis gikan sa kapital nga Tegucigalpa padulong sa Omoa sa Cortes aron magpatuman og operasyon batok sa mga gangs apan na-ambush sila.
Gika-ingong misulod ang mga pulis sa usa ka building aron pagpangita sa mga suspek apan gipamusil sila resulta sa pagkamatay sa unom ka mga pulis ang namatay,.
