BUTUAN CITY- Hugtanong gi-insistar ni Senate President Alan Peter Cayetano nga ang National Bureau of Investigation ang nag-unang responsabel sa natigayong tensyon sa Senado niadtong mi-aging adlaw. Sumala ni Cayetano, wala matud pa nagsulti sa tinuod si NBI Director Melvin Matibag sa mga pamahayag niini kalabot sa tinuod nga operasyon sa NBI gawas sa Senado sa pagsulay pag-aresto kang Senador Ronald “Bato” Dela Rosa.
Natuo ang Senate President, nga namakak si Director Matibag kalabot sa mga impormasyong gipanghatag niini kang President Ferdinand Marcos Jr., gani posibleng wala matud pa minghatag ang Presidente og direktiba sa NBI Chief apan adunay taas nga opisyal sa gobyerno ang pwedeng magmando niini nga asrestohon si Dela Rosa. Posible usab nga adunay kalabotan niini sila kanhi Senator Antonio Trillanes IV tungod kauban kini sa NBI sa unang adlaw nga sikop unta si Dela Rosa.
Gi-ila ni Cayetano ang lahi-lahi nga statement ni Matibag kung asa una niining gibutyag nga walay naka-asign nga NBI Personnel duol sa Senado, apan sa wala magdugay, gi-angkon matud pa sa Direktor human nanggawas ang mga video kung asa nakita ang mga personahe sa Departamento sulod sa Government Service Insurance System kon GSIS nga daw minghimo og inspection sa mga sakyanang manggawas gikan sa Senado.
Ang pamahayag ni Cayetano gihimo human gikomperma ni Ombudsman Jesus Crispin “Boying” Remulla nga pahamtangan nila og 6 months preventive suspension si Acting Senate Sergeant-at-Arms Mao Ranada Aplasca human ang maong insidente sa Senado. Sigon ni Remulla, posibleng magpagawas og subpoena ang Ombudsman batok kang Aplasca sa sunod simana.
Sumala niini, posibleng mag-atubang kini og mga bug-at nga violations sama sa Obstruction of Justice ug Failure to Maintain Public Order and Safety inside the Senate Premises. Gikwestyon usab sa Ombudsman, ang unang pagpaboto og pusil ni Aplasca sa sulod sa Senado, sigon Remulla, lisud matud pa pasayloon ug dili joke ang gihimo sa retired police tungod posibleng adunay madamay nga mga taohan sa media nga anaa sulod sa building.
