BUTUAN CITY- Gikuwestiyon ni Jocelyn Andamo, Presidente sa Filipino Nurses United, ang giingong pagkawala ni Senador Ronald “Bato” Dela Rosa gikan sa Senado bisan pa sa presensya sa daghang miyembro sa militar ug kapulisan, kansa iyang gihulagway nga usa ka seryosong kapakyasan sa implementasyon sa balaod ug proseso sa pagdakop. Sigon niini, lisod tuohan nga makalingkawas ang usa ka personalidad nga giingong adunay warrant gikan sa International Criminal Court (ICC) kon hugot ang seguridad sa maong lugar.
Gipasiugda usab ni Andamo nga ang pag-apruba sa ICC sa warrant of arrest batok kang Dela Rosa nagpasabot nga adunay igo nga basehan aron atubangon niini ang hustisya nga adunay kalabotan sa mga alegasyong human rights violations ug mga insidente sa “Tokhang” atol sa administration ni kanhi President Rodrigo Roa Duterte. Sumala pa niini, nga ang mga pamilya sa mga biktima dugay nang naghulat og hustisya ug dili angay nga mapakyas pag-usab ang sistema sa pagpanubag.
Dugang pa ni Andamo, daghan gihapoy wala matubag nga pangutana kabahin sa nahitabong kagubot, lakip na ang giingong pagpamusil atol sa insidente niadtong miaging gabi, hinungdan nga nangayo kini og transparent ug independenteng imbestigasyon aron masuta kon adunay mga opisyal nga posibleng mitabang sa pag-ikyas ni Dela Rosa. Matod ni Andamo, importante nga mapakita sa gobyerno ang seryosong pagpatuman sa balaod ug paghatag og hustisya sa mga biktima sa giingong paglapas sa tawhanong katungod.
