BUTUAN CITY- Nakatala og bag-ong Guinness World Records (GWR) ang Pilipinas sa pinakadakong pagpalutaw og water lanterns human magpalutaw og 11,016 ka parol sa usa ka 12-ektaryang artipisyal nga lawa niadtong Domingo. Gihimo ang record attempt sa Lumina Water Lantern and Music Festival diin gisugaan sa mga ticket-holder ang liboang parol ug nalabwan ang target nga 10-mil. diin gikumpirmar ang kadaugan ni Emi Saito, kansa gipadala sa Guinness World Records isip opisyal nga adjudicator.
Ang mga paper lantern gibutang sa mga kahoy nga floaters ug gibutangan og gamay nga LED lights, nga milutaw og kapin lima ka minuto isip kabahin sa dungang display nga giorganisar sa Vibe Events Management Corp. ug The Lakeshore.
Sumala sa mga lokal nga opisyal, gipalig-on sa bag-ong record ang dugay nang tradisyon sa Pampanga sa paghimo og lanter, lakip na ang mga handcrafted lantern ug ang sikat nga Giant Lantern Festival nga muabot na sa ika-118 ka tuig sa Disyembre.
Ang lawa diin gihimo ang kalihukan parte sa The Lakeshore, usa ka 300-ektaryang residential ug recreational development nga gitukod 26 ka tuig na ang nakalabay.
Sumala ni James Madrid, presidente sa Vibe Events Management Corp., giapil usab sa aktibidad ang mga lakang para sa cleanup, disposal ug recycling, lakip na ang uban pang eco-friendly nga inisyatiba.
