BUTUAN CITY- Nagbutang na og mga welcome tarpaulins ang mga sakop sa Technical Working Group kon TWG sa Palarong Pambansa uban sa Civil Aviation Authority of the Philippines kon CAAP ug Department of Education kon DepEd alang sa initon nga pagsugat sa mga delegado alang sa ika-66 nga edisyon sa umalabot nga Palarong Pambansa 2026.
Kini aron ipakita ang pagdawat, pagsuporta, ug pagkama-abi-abihon sa dakbayan sa Butuan ngadto sa mga atleta, coaches, ug delegado nga mu-agi ug mu-abot sa Bancasi Airport gikan sa nagkalain-laing rehiyon sa tibuok nasud.
Pinaagi sa panagtinabangay sa lokal nga kagamhanan, mga ahensya, ug mga partner agencies gustong ipakita sa Butuan City government ang diwa sa kooperasyon ug kahinam sa pagsuporta sa usa sa labing dako nga sporting event sa nasud.
Ang matag tarpaulin dili lamang dekorasyon kundili simbolo sa garbo, panaghiusa, ug ma-initong pagdawat sa mga bisita nga magdala sa damgo ug talento sa kabatan-unang Pilipino.
Samtang nagkaduol ang Palarong Pambansa 2026, andam ang Butuan City sa pagpakita sa iyang kultura sa hospitality, organisado nga pagpangandam, ug walay katupngan nga suporta alang sa mga delegado nga mu-agi sa syudad.
