BUTUAN CITY- Gihimo nga mas makalingaw ug sayon masabtan ang pagsaulog sa Road Safety Month ning bulan sa Mayo pinaagi sa mga interactive nga kalihukan sama sa on the spot painting, quiz bowl, ug tiktok video challenge contest.
Buot sa City Government of Butuan nga mahibal-an sa publiko ang importansiya sa disiplina ug responsableng pag-gamit sa kalsada. Tinguha sa kampanya nga madugangan ang kahibalo sa katawhan bahin sa traffic rules, road signs, ug road safety.
Gigamit usab ang social media aron mas daghang impormasyon ang makaabot sa publiko kabahin sa kaluwasan sa dalan.
Sa resulta sa mga kompetisyon, nakuha sa FSUU Team 2 ang kadaugan sa Quiz Bowl, samtang si Cristian Joren Capoy sa Caraga State University (CSU) ang napili sa On-the-Spot Painting. Sa TikTok Video Challenge, midaug ang Philippine Electronics and Communication Institute of Technology (PECIT).
Nagpakita usab og suporta sa maong kalihokan si City Councilor Glenn Carampatana uban si CHED Education Supervisor Ever Joy Rabadan.
Matud sa mga opisyal, ang kaluwasan sa dalan responsibilidad sa tanan. Importante ang disiplina ug pagmatngon sa matag motorista, pasahero, ug pedestrian aron malikayan ang aksidente ug magpabiling luwas ang komunidad sa kadalanan.
