BUTUAN CITY – Gipahayag ni Caloocan Representative Edgar Erice nga dili siya moapil sa impeachment proceedings batuk kang Vice President Sara Duterte sa plenaryo, tungod sa matud pay nagamit lang kini sa pulitika ug kulang sa moral ascendancy ang Kamara.
Sumala sa magbabalaod, daw napili lang sa mga magbabalaod ang paggamit sa Konstitusyon kung kini pabor sa ila, samtang wala matud pa natuman ang mandato niining magmugna og anti-political dynasty law.
Pamugos pa niini, ang impeachment dili usa ka “principled process” kundi usa ka panagbangga sa mga kanhe magka-alyado sa pulitika, nga nahulog sa isyu sa gahum.
Dugang pa sa kongresista, mibalibad siyang mahimong parte sa gitawag niyang political spectacle nga dili makatabang sa katawhan.
Dili usab matud pa nahisgutan ang isyu sa mga kaubanan sa Liberal Party apan gipamugos nga gitugutan ang “conscience vote” sa ilang han-ay.
Mahitungod usab sa mga ebidensyang gilatag sa impeachment hearings, gibutyag ni Erice nga dili pa pinal ang Commission on Audit notice of disallowance ug dili usab conclusive ang taho sa Anti-Money Laundering Council rasong dili igo ang mga niini isip lig-on nga basehan.
