BUTUAN CITY- Gibutyag sa abugado nga si Raymund Batu, Legal Counsel sa DDS Sara All Confederation kalabot sa nahimong dagan sa impeachment hearing batok kang Vice President Sara Duterte sa House Committee on Justice, nga daw nagpakita og “sarswela” ug murag usa ka full-blown trial imbes nga preliminary hearing lang.
Sigon pa niini, nga sobra ang ebidensya nga gipresentar, lakip na ang pagpasulod sa testimonya ni Ramil Madriaga ug mga supplemental affidavit ni Antonio Trillanes nga wala sa orihinal nga impeachment complaint. Dugang pa ni Batu, ang pag-subpoena ug pagpakita sa Anti-Money Laundering Council kon AMLC records sa publiko naghatag og impresyon nga ang komite wala lang nag-evaluate sa probable cause, apan naglihok na mismo isip complainant sa kaso, usa ka butang nga giingon niining dili angay ug dili mao ang mandato sa Committee on Justice.
Dugang pa ni Atty. Batu, nga sa kasamtangan daghan na ang ming-atras sa pagsuporta sa impeachment complaint batok sa Bise Presidente tungod dili matud pa gusto nga madala ang ilang pangalan sa isyu. Gibutyag usab niini, nga lisod masiguro kung makuha ang gikinahanglan nga 106 ka boto sa plenaryo, kansa 1/3 sa 316 ka miyembro sa Kamara.
Gikwestyon usab ni Batu ang mga kongresista kalabot sa pagpaminaw sa tingog sa katawhan, hilabi na nga aduna matud pay kongresista sa Bukidnon ang mitug-an nga 90% sa iyang mga constituents dili gusto sa impeachment, apan iyang gipili gihapon nga buhaton ang iyang obligasyon. Base sa iyang obserbasyon, kinahanglan nga timbangon sa mga miyembro sa Kongreso kung kini ba usa ka lehitimong kaso o usa lang ka porma sa political persecution batok sa Bise Presidente.
Gi-insistar ni Atty. Bato, nga ang desisyon sa mga kongresista mahimong mahinungdanon ug madala sa kasaysayan, ug kini mao ang panahon nga ipakita nila ang ilang konsensya ug ang tinuod nga hustisya.
