BUTUAN CITY – Gimanduan karon sa Korte Suprema ang Malacañang nga magkomento sa petition for mandamus nga giduso ni kanhi House Speaker Pantaleon Alvarez.
Ang maong petisyon mihangyo nga obligahon si Pangulong Ferdinand “Bongbong” Marcos Jr. nga mupa-ilalom sa pisikal ug mental examination apil na ang hair follicle drug test.
Apil sa nakalatid sa petisyon ang direktiba nga ipagawas ug ipahibalo ngadto sa publiko ang medical report nga magbutyag sa resulta sa pagsusi, apil na ang klinikal nga kumpirmasyon sa iyang pisikal ug mental nga kakapas aron himuon ang iyang katungdanan isip pangulo.
Gihatagan og napulo ka adlaw nga wala na’y lugway ang mga respondents, higayong madawat na nila ang abiso aron magsumite sa ilang komento.
Ang lakang sa Korte Suprema, magbukas sa mas lawom nga isyu kalabot sa transparency ug accountability sa pinakatas nga opisyal sa nasud ilabina taliwa sa mga panawagan aron masiguro ang maayong panglawas ug kakapas sa pangulo.
