BUTUAN CITY – Gidayeg sa Department of Tourism (DOT) ang girl group nga BINI ug ang Filipino nga miyembro sa multinational girl group nga si Sophia Laforteza human sa ilang makasaysayang debut sa Coachella Valley Music and Arts Festival sa Estados Unidos.
Sumala sa DOT, gipakita sa mga artistang Pilipino ang abilidad ug garbo sa nasud sa usa sa pinakadako nga music festivals sa kalibutan, diin ang BINI nahimong unang Filipino act nga naka-perform sa Coachella.
Ang ilang performance milungtad og 45 minutos nga adunay 10 ka kanta, ug nakadani kini og atensyon gikan sa international audience, diin makita usab ang pagwara-wara sa mga bandila sa Pilipinas.
Gibutyag sa ahensya nga ang dungan nga pagpakita ni Sophia Laforteza ug BINI sa entablado nagpakita sa nagkadako nga impluwensya sa musikang Pilipino sa global stage. Gidayeg usab sa DOT ang ilang kontribusyon sa pagpakita sa kultura, talento, ug identity isip Pinoy sa tibuok kalibutan.
Isip pag-ila, nagsumite si Negros Occidental 3rd District Rep. Javi Benitez og House Resolution No. 930 aron pasidunggan ang BINI isip unang Filipino pop group nga naka-perform sa Coachella.
Human sa Coachella, nakatakda na usab nga mag-perform ang BINI sa Grammy Museum sa Abril 21, diin ipaila usab nila ang ilang bag-ong extended play nga “Signals.”
