BUTUAN CITY – Posibleng imbitaron sa Senate Blue Ribbon Committee sa sunod nga pagdinig ang nadakpan nga kanhi kongresista nga si Elizaldy “Zaldy” Co, uban si Orly Guteza ug pipila ka kanhi sundalo nga nag-angkon nga sila ang nagdala sa P805 bilyon nga kickbacks gikan sa giingong maanomalusong flood control projects ngadto sa nagkalain-laing personalidad, sumala sa sugo ni Co. Kini ugaling pormal nang masang-at ang partial committee report sa flood control scandal.
Sigon ni Senador Panfilo “Ping” Lacson, Senate President Pro Tempore ug chairman sa Blue Ribbon Committee, nga ang mga testimonya nila Guteza ug sa mga kanhi sundalo “konektado” kang Co.
Mas maayo matud pa nga dungan silang paminawon sa pagdungog aron klaro kung unsa gyud ang tinuod sa giingong paghatod og dagkong kantidad nga kwarta.
Sumala pa ni Lacson, si Co, nga kaniadto chairman sa House appropriations committee, dako og mahatag sa imbestigasyon tungod kay giila siya nga “arkitekto” sa giingong anomalya sa flood control projects, ilabi na sa pagpasulod ug pag-apod-apod sa pondo ngadto sa Department of Public Works and Highways.
Dugang pa niini nga mahimo nilang imbitahon ang ubang personalidad sama nila Adrian Bersamin ug Amenah Pangandaman kung maapil sila sa testimonya ni Co.
Gipasabot ni Lacson nga wala nila giapil sa opisyal nga rekord ang mga pamahayag ni Co sa social media tungod kay wala kini nanumpa.
Samtang sa mahitungod kang Pangulong Ferdinand Ferdinand Marcos Jr. ug Kanhe House Speaker Martin Romualdez, gibutyag ni Lacson nga dili mahimong ipatawag sa Senado ang Pangulo tungod sa prinsipyo sa separation of powers, samtang ang pag-imbitar kang Romualdez kinahanglan moagi sa Office of the Speaker isip kabahin sa inter-parliamentary courtesy.
