BUTUAN CITY – Gipahayag ni Akbayan Partylist Rep. Chel Diokno nga usa si Ramil Madriaga sa labing importante nga testigo sa imbestigasyon sa Kamara batok kang Vice President Sara Duterte.
Sumala ni Diokno, kinahanglang personal nga madungog sa House Committee on Justice ang testimonya ni Madriaga aron mapamatud-an ang sulod sa iyang affidavit kabahin sa giingong sayop nga paggamit sa confidential funds sa Office of the Vice President ug Department of Education.
Si Madriaga, nga gitumbok nga kanhing “bagman,” karon napriso sa Taguig tungod sa kasong kidnapping ug gilauman nga moatubang sa komite karong Abril 14, 2026.
Dugang pa ni Diokno, ang iyang testimonya mahimong makapalig-on sa reklamo o mahimong hinungdan sa pagbasura sa kaso.
Sa pagkakaron, anaa pa sa unang yugto ang imbestigasyon aron matino kung adunay igo nga basehan sa dili pa kini ipasa ngadto sa Senado.
