BUTUAN CITY – Kwalipikado na ang Gilas Pilipinas women’s team sa FIBA 3×3 World Cup nga himoon sa Poland.
Kini human gipakuratan sa koponan ang hometeam nga Singapore sa iskor 21-10 sa ilang World Cup qualifiers matchup kaganina lang alas 8:00 sa gabii.
Sa pagsugod sa dula nahimong dikit ang away hangtud nga inanay nakabiya ang Pilipinas sa 13-7 nga labaw human ang lay-up ni Kacey dela Rosa.
Mitubag pa si Jermaine Lim Jia Ying sa Singapore apan padayon ang maayong dula nga gipakita sa Gilas diin miabot sa 16-8 ang iskor tungod sa duha ka puntos ni dela Rosa points nga gisundan pa sa lay-up ni Mikka Cacho.
Gitapos ang maong dula pinaagi sa duha ka freethrow ni Afril Bernardino og nakuha ang ticket ngadto sa World Cup ticket sa iskor 21-10 sa 38.8 segundos nalang ang nahabilin.
Kini ang unang higayon nga ang Pilipinas makasulod sa World Cup sukad niadtong 2018 diin ang torneyo gihimo dinhe sa nasud.
Ang 3×3 World Cup gikatakdang himoong sa Hunyo.
