BUTUAN CITY – Sikat karon sa Kenya si Rogers Olu Maguta, dili ordinaryong 27-anyos nga lalaking wala’y balay ug maglakaw-lakaw lang siya sa Nairobi nga adunay mga langgam sa iyang ulo ug abaga. Kadaghanan sa iyang oras gigahin sa pag-atiman sa mga langgam hangtud andam na silang mobalik sa kalasangan. Bisan gamay ra ang iyang pagkaon, andam siya ipanghatag kini sa iyang mga kauban nga langgam.
Nailhan siya sa Kenya isip Nairobi Birdman kansa nakadani og atensyon sa kalibutan ilabina niadtong 2025 sa panahon sa dagkong protesta sa Nairobi. Ang iyang talagsaong hitsura—daghang langgam ang anaa sa iyang ulo ug abaga—nakapahimo kaniya nga icon sa social media apan nahimo usab siyang target sa kapulisan ug gkulata gamit ang baton.
Sukad pa sa pagkabata, kanunay siya moadto sa Lake Nakuru National Park aron tan-awon ang mga flamingo, stork, ug black kites tungod kay ganahan gyud siya sa langgam, apan nagbag-o ang iyang kinabuhi lima ka tuig na ang milabay dihang usa ka samdan nga langgam ang nidool kaniya ug nangayo og tabang. Ginganlan niya kini og Johnson ug halos dili sila mabulag.
Nakita sa uban ang lalaki nga adunay langgam sa abaga ug nagsugod sila og pagdala sa uban pang samdan nga langgam kaniya. Bisan walay training, gitabangan niya kini ug gitugotan nga mobalik sa kalasangan. Ang uban nagpabilin ug nahimong iyang kauban. Mao kana ang pagsugod sa Nairobi Birdman.
Nakabalo siya og daghang langgam gikan sa kapin 20 ka species bisan walay balay ug lisod ang iyang kinabuhi. Gusto niya nga mahimong inspirasyon sa uban pinaagi sa iyang gugma sa langgam ug kinaiyahan. Iyang gipakita ang iyang kinabuhi sa TikTok, Instagram, ug Facebook.
