BUTUAN CITY – Mipaspas pa sa 4.1% ang inflation rate o lebel o kapaspas sa pagtaas sa katibuk-ang presyo sa mga palaliton og serbisyo sa nasud niadtong Marso, sumala sa Philippine Statistics Authority (PSA).
Kini dungan sa pagsutoy sa presyo sa lana ug transportasyon.
Mas paspas kini kumpara sa 2.4% nga natalang inflation rate niadtong Pebrero sa kasamtangang tuig.
Milapas usab kini sa 2% hangtud sa 4% nga target inflation nga gitakda sa gobyerno ug sa forecast range sa Bangko Sentral ng Pilipinas (BSP).
Sa panagtigum ning adlawa Abril 7, gipahayag ni PSA USec. ug National Statistician Claire Dennis Mapa nga ang inflation niadtong Marso 2026 pinakapaspas nga natala sa nakalabay nga duha ka tuig o sukad Hulyo 2024 diin milansang ang inflation sa 4.4%.
Usa sa nag-unang nakatampo sa overall inflation niadtong Marso mao ang transport commodity nga anaa sa 9.9%, nga pinakataas sa nakalabay nag tulo ka tuig.
Mitaas usab ang presyo sa lana sukad gisugdan ang giyera sa US ug Israel batuk sa Iran niadtong Pebrero 28.
Sumala sa PSA Chief, sugod niadto, mitaas ang presyo sa gasolina, diesel lakip na ang singil sa kuryente.
