BUTUAN CITY – Gisuportahan ni Senate Pro Tempore Panfilo Lacson ang sugyot nga joint oil ug gas exploration tali sa Pilipinas ug China, ilabi na sa West Philippine Sea, taliwala sa hulga sa global nga suplay sa lana tungod sa tensyon sa Middle East.
Sigon ni Lacson, kinahanglang tun-an sa administrasyon ni Pangulong Ferdinand Marcos Jr. ang nasangpit nga lakang tungod kay aduna kini potensyal nga makahatag og dakong kita ug makatabang sa energy security sa nasud.
Apan, iyang giklaro nga ang bisan unsang kasabutan kinahanglan mosunod pag-ayo sa 60-40 foreign ownership rule nga gilatid sa 1987 Constitution, diin dili moubos sa 60% kinahanglang pagpanag-iya sa mga Pilipino.
Dugang pa sa senador, bisan pa man og dato sa lana ug natural gas ang West Philippine Sea, kulang ang Pilipinas sa teknikal ug pinansyal nga kapasidad aron mag-explore nga mag-inusara.
Sa laing bahin, gibutyag niini nga aduna ang China sa gikinahanglan nga teknolohiya alang niini.
Kung mosugot ang China sa 60-40 nga bahin, kini usa ka timailhan sa pag-ila sa soberanya sa Pilipinas sa maong katubigan.
Gibalikan usab ni Lacson nga niadtong administrasyon ni Rodrigo Duterte, gihisgutan na kining inisyatiba uban kang Senate President Vicente Sotto III ug kanhi Senador nga Gregorio Honasan, ug giingong bukas niini ang kanhing Pangulo.
