BUTUAN CITY – Walay angayang kabalak-an sa suplay sa kuryente sa rehiyon sa Caraga.
Kini ang giklaro ni Kristoffer Abellanosa, tigpamaba sa National Grid Corporation of the Philippines kon NGCP-District 2 Northeastern Mindanao Area sa pakighinabi sa Bombo Radyo Butuan.
Sigon sa opisyal nga dunay igong suplay sa kuryente para sa rehiyon apan mag-depende gihapon kini sa paggamit tungod sa lihok karun sa merkado nga apektado sa geo-politics.
Kini ang rason hugot gihapon nilang gipanawagan ang katawhan nga magdaginot sa paggamit sa kuryente.
Aduna matud pay 3,487 ka mega watts ang available nga igo na sa Caraga.
Lakip usab sa giklaro ni Abellanosa nga walay gipatuman nilang increase sa bayaran sa mga electric cooperative nga ilang gi-suplayan og kuryente.
Ugaling dunay ipatuman silang increase sa power rates, kinahanglang aplayan pa nila kini sa Energy Regulation Commission og kung aduna man, maghatag sila og official release.
Pasabot pa sa opisyal nga ang Department of Energy ang nahibalo kung duna bay adjustments sa power plants rasong sila usab ang gitugutang mopagawas og advice sa publiko.
