BUTUAN CITY- Tungod sa paspas nga pagsaka sa presyo sa mga produktong petrolyo, naglusad ug Inspection sa tanang mga Gasoline Stations sa Syudad sa Cabadbaran, ang Department of Trade & Industry (DTI), kauban ang mga personahe sa Business Permits & Licensing Division (BPLDiv), ug pipila ka myembro sa City Price Coordinating Council (CPCC).
Unang gipahigayon ang short briefing sa grupo, nga gipangunahan ni DTI Agusan del Norte Senior Trade Development Specialist Elmer General, kauban sila si DTI Trade Development Specialist Ralph Gorgoio, Cabadbaran City Negosyo Center Senior Business Counsellor Desiree Romerosa, ug BPLDiv Head Celestia Sanchez, aron sayron ang mga nag-unang lakang nga nahisubay sa balaud.
Human sa briefing, nilibot dayon ang grupo sa Syudad, aron susihon ang Unse (11) ka mga Gas Stations sa Syudad, kon nahisubay ba sa balaud ang pagpatuman sa saktong presyo sa mga produktong petrolyo.
Alayon niini, subling nagpahimangno ang DTI nga sundon ang insaktong pagpatuman sa mga presyo sa mga palaliton, hilabi na sa mga produktong petrolyo.
