BUTUAN CITY – Giklaro sa Catholic Bishops Conference of the Philippines kon CBCP na wala’y kwenta ang pagpangayo’g pasaylo ug pagpangumpisal sa mga tag-as nga opisyal sa gobyerno karong Semana Santa kung dili gihapon nila i-uli ang ilang gikurakot nga kwarta sa katawhang Filipino.
Sa eksklusibong pakighinabi sa Bombo Radyo Philippines, gipadayag ni CBCP Research Director Reverend Father Vladimir Echalas, ang tinuod nga pahig-uli sa Diyos, nagkinahanglan og tinuod nga aksyon sama sa integral reconciliation ingon man retribution aron mahimong hingpit ang paghinulsol sa nga nalambigit sa lapad nga kurapsyon.
Gawas sa isyung pagkawat sa pundo sa gobyerno, gihagit usab niya ang publiko ug ang media industry nga mubarog alang sa kamatu-uran aron batukan ang delikadong pagkaylap sa fake news, misinformation ug disinformation.
Gipasabot sa maong pari nga angayan lang gamiton ang mga makinarya sa komunikasyon paghatud sa kamatu-uran ug dili kay pagtu-is o ba kaha pagkuriher sa kamatu-uran nga gipakaylap sa mga binayrang trolls.
Gipahimangnuan usab niya ang mga tigbalita sa ilang katungdanan nga ipatigbabaw ang kamatu-uran ug tinuod nga impormasyon dayong tambag usab sa publiko nga mutuo lang sa mga lehitimo ug mainstream sources sama sa Bombo Radyo Philippines.
