BUTUAN CITY – Gikumpirma sa Israel nga ilang napatay ang hepe sa Iranian Navy nga nagdumala sa halos total blockade sa Strait of Hormuz.
Si Alireza Tangsiri, hepe sa navy sa Islamic Revolutionary Guards Corps (IRGC), mao matud pa ang direktang responsable sa teroristang pagpamomba ug pagbabag sa Strait of Hormuz ug napabuto, sumala ni Israeli Defense Minister Israel Katz.
Gidugang pa niya nga adunay ubang mga senior officials sa Navy nga napatay usab apan wala pa’y opisyal nga komento ang Iran bahin niini.
Nasayrang sukad nagsugod ang gubat niadtong Pebrero 28, nakapatay na ang Israel og pipila ka taas nga opisyal sa Iran, lakip na ang Supreme Leader nga si Ayatollah Ali Khamenei ug ang hepe sa seguridad nga si Ali Larijani.
Ang epektibong pagbabag sa Strait of Hormuz — ang pi-ot nga agi-anlan sa dagat tali sa Iran, United Arab Emirates (UAE), ug Oman, diin moagi ang mga 20% sa suplay sa lana ug liquefied natural gas sa kalibutan — usa ka importante nga bahin sa estratehiya sa Iran sa gubat.
