BUTUAN CITY – Laumang magpadala ang Pentagon og dugang liboang sundalo gikan sa elite 82nd Airborne Division padulong sa Middle East, sumala sa mga taho samtang padayon ang giyera tali sa Estados Unidos ug Iran.
Sigon sa mga source, anaa tali sa 3,000 hangtud 4,000 sundalo ang mamahimong i-deploy aron pakusgon ang presensya sa Amerika sa rehiyon, bisa og padayon nga gibutyag ni U.S. President Donald Trump nga abli siya sa negosasyon sa Iran para sa mahunong ang giyera.
Dili pa klaro kung asa eksaktong ipadala ang mga tropa sa U.S., apan sumala sa taho tumong niining palapdan ang kapasidad sa Estados Unidos para sa posibleng operasyon.
Sa kasamtangan, gibana-banang anaa sa 50-mil na ang tropang Amerikano ang anaa sa Middle East.
Una nang nagpadala ang U.S. og dugang pwersa niini lakip ang mga Marines ug mga war ship sama sa USS Boxer.
Sa pikas bahin, padayon ang mga opensiba sa U.S., nga matud pa miabot na sa liboang target sulod sa Iran.
Sa pinakaulahing datos niini, 13 ka sundalong Amerikano na ang namatay og halos 300 ang samaran.
Bisan paman niini, nagpabiling hagit para sa administrasyon ni Trump ang ubos nga suporta sa publiko sa kampanya batuk sa Iran, sumala sa usa ka survey diin mas daghan ang supak kaysa misuporta sa nasangpit nga aksyong militar sa Amerika.
