BUTUAN CITY – Ipa-subpoena na usab sa House Justice Committee ang Income Tax Returns kon ITR nila Vice President Sara Duterte ug iyang bana nga si Atty Manases ‘Mans’ Carpio apil na ang Value Added Tax kon VAT reference sa tanan nilang mga negosyong nakalista sa Statements of Assets, Liabilities and Networth kon SALN gikan sa tuig 2023 hangtud 2024.
Sigon ni Bicol Saro Rep Terry Ridon, gawas pa kini sa ipa-subpoena usab nilang bank transactions tungod kay base matud pa sa gisubmiteng 2024 SALN sa besi presidente, duna siya’y 88-milyunes pisos nga net worth apan sa gisusi nila nga cumulative salary gikan niadtong tuig 2007 hangtud 2024, mi-abot lang kini sa 30 hangtud 40-milyunes pisos.
Sigon ni Ridon, kinahanglang mapasabot sa besi presidente ang kwestyunableng gap aron maklaro pinaagi sa gitawag nga other lawful income gikan sa law practice ug business interests nga nakalista sa ilang SALN.
Giklaro pa sa magbabalaud nga kinahanglang masusi sa impeachment proceedings ang revenues sulod sa 17 ka mga tuig nga anaa sa 200-milyunes pisos hangtud 400-milyunes pisos aronmapagawas ang 50-milyunes pisos nga gap tali sa cumulative salary ni VP Sara.
Apil sa ilang gipangayong dokumentasyon ang gikan sa Anti-Money Laundering Council kalabot sa kadudahan matud pa nga mga transaksyon nga anaa ilalom sa account names sa magti-ayon ka-uban si kanhi Pangulong Rodrigo Duterte.
