BUTUAN CITY- Gipadayag ni Bangon Sambayanan People’s Movement Secretary General Jeffrey “Ka Erick” Celiz nga ang pamahayag ni Ombudsman Jesus Crispin “Boying” Remulla bahin sa giingong maleta-maletang delivery sa kuwarta usa lamang ka pagpanglibog sa publiko.
Sigon ni Celiz, dili klaro ang pamahayag ni Remulla nga nahitabo kini sa panahon ni kanhi President Rodrigo Roa Duterte, tungod kung kini nahitabo matud pa sa kanhi administrastion posibleng adunay manubag.
Matud pa niini, nga possibleng adunay ginagmay nga problema sa mga infrastructure project sama sa 10% nga komisyon, apan lisod tuohan nga nahitabo ang bilyones pesos nga kickback ug toneladang kuwarta sa administrasyon ni Duterte, ilabi na nga giangkon usab sa magti-ayong Discaya atol sa imbestigasyon sa Senado nga lisod mangurakot niadtong panahona tungod sa kahadlok sa silot.
Gipunting ni Celiz nga sa administrasyon ni President Ferdinand Marcos Jr. ug kanhi Speaker Martin Romualdez mas nahimong sistematiko ug mas dako ang giingong korapsyon, ilabi na sa flood control projects gikan sa 2023 hangtod 2025 nga ming-abot og dul-an ₱1.4 trilyon, diin giingong 80% niini mga “ghost projects,” ug kung itandi sa pamahayag ni Remulla nagpasabot kini og giingong kalkuladong pag-angkon kansa dugay nang nagpadayon ang maong anomalya.
