BUTUAN CITY – Gibutang na isip “high-risk area” kagahapon ang Strait of Hormuz alang sa mga tripulanteng Pilipino taliwala sa nagpadayon nga kagubot sa Middle East.
Sigon ni Department of Migrant Workers kon DMW USec. Bernard Olalia, gipalapdan pa ang advisory alang sa maritime sector diin gi-klasipika na usab ang kritikal nga ruta alang sa oil shipments kon delikado nga lugar.
Ang moang klasipikasyon, naghatag og katungod sa mga Pilipinong seafarers nga dili musakay sa barko nga mulabay sa maong agi-anan apan kung aduna wala na’y kapili-an duna silay katungod alang sa dugang benepisyo ug sweldo.
Ang Strait of Hormuz nahimutang tali sa Iran ug Oman, diin mu-agi ang mga nasud nga nagkinahanglan og konsumo sa lana sa kalibutan rason nga importante nga siguruhon ang luwas nga ruta. Kini ilabina nga ang maong parte sa kadagatan ang nagkutay sa pinakadako nga mga oil producing countries sa Middle East sama sa Saudi Arabia, Iran, Iraq, United Arab Emirates, Gulf of Oman ug Arabian Sea.
Apan, tungod sa bag-ong mga pag-atake sa Amerika ug Israel batok sa Iran, mibalos usab sa duha ka nasod ug sa ilang mga kaalyado sa Gulf states, grabe ang epekto sa oil shipping sa kritikal nga lagusan.
