BUTUAN CITY – Mukabat sa 300 ngadto sa 400 ka mga Filipinos ang mamatay kada-tuig tungod sa rabies samtang 4 milyunes usab ang mga kaso sa animal bite.
Sigon ni animal expert Dr. DJ Darwin Bandoy, kinahanglan karon ang pagpahibalo sa publiko sa mga angayan nilang masayran kalabot sa delikadong mahatud sa rabis diha sa ilang panglawas samtang nagpabiling dako nga public health concern ang vaccination efforts sa gobyerno ilabina ngadto sa mga pasyenteng gi-classify nga anaa sa category 3 exposure, kon high-risk bites, nga nagkinahanglan og dinaliang pagbakuna.
Giklaro ni Bandoy nga ang pagbakuna dili lang limitado diha sa mga iro nga laaw nga maoy gitu-uhan sukad pa kaniadto sa publiko.
Kini tungod kay makuha usab kini bisan diha sa mga binuhi natong mananap ilabina kung dili bakunado.
Importante matud pa ang tinuig nga pagbakuna sa mga binuhing kahayupan sama sa iro, iring, ug uban pa.
