BUTUAN CITY – Gipagawas na sa US military ang pangalan sa unang upat sa unom nila ka mga sundalo nga namatay sa giyera nila tali sa Iran human nga ang usa ka “unmanned aircraft system,” ang nakalikay sa mga depensa sa kahanginan ug mi-igo sa usa ka command centre sa Port Shuaiba, Kuwait.
Sa sinugdan, ang US Central Command nagbutyag nga tulo ka sundalo ang namatay sa pag-atake, apan gikumpirma sa mga opisy nga nadoble ang ihap sa namatay, human nga usa ka tawo namatay tungod sa mga samad ug duha pa ka mga lawas ang nakit-an sa mga nagun-ob nga bahin sa bilding.
Upat sa mga namatay, tanan sakop sa US Army Reserve, nga gi-ilang sila US Capt Cody Khork, 35-anyos; Sgt Noah Tietjens, 42-anyos; Sgt Nicole Amor, 39-anyos ug Sgt Declan Coady, 20-anyos.
Si Khork, nga taga-Florida, kaniadto na-deploy sa Saudi Arabia, Guantanamo Bay ug Poland.
Samtang si Amor, nga taga-Minnesota, na-deploy na kaniadto sa Kuwait ug Iraq. Si Tietjens usab nga taga-Nebraska, duha ka higayon na usab nga na-deploy sa Kuwait.
Ang taga-Iowa nga si Coady gi-promote human sa iyang kamatayon gikan sa ranggo nga specialist, kondiin misulod siya sa Army Reserve tulo lamang ka tuig ang milabay.
